అనాథ పిల్లలకు విద్యా సామగ్రి పంపిణీ, బాల్య వివాహాలపై అవగాహన
జన్నారం, నవంబర్ 14(ప్రజా ముద్ర న్యూస్) : బాలల దినోత్సవం సందర్భంగా మంచిర్యాల జిల్లా జన్నారం మండలం చింతగూడ గ్రామంలో ప్రత్యేక గ్రామసభను నిర్వహించారు. గ్రామ సర్పంచ్ సుతారి సుమలత వినయ్ ఆధ్వర్యంలో జరిగిన ఈ కార్యక్రమంలో పిల్లల సంక్షేమం, విద్య మరియు భవిష్యత్తుకు సంబంధించిన పలు కీలక అంశాలపై అవగాహన కల్పించారు.
ఈ సందర్భంగా సర్పంచ్ సుమలత మాట్లాడుతూ.. అనాథ పిల్లలకు సమాజం అండగా నిలవాలని, వారికి ఎలాంటి ఇబ్బంది కలగకుండా చూసే బాధ్యత అందరిపై ఉందని పేర్కొన్నారు. గ్రామంలోని పిల్లలందరికీ చదువు ప్రాముఖ్యతను వివరిస్తూ, వారి చదువుకు ఉపయోగపడే పుస్తకాలు మరియు స్టడీ మెటీరియల్ను స్వయంగా అందజేశారు.
అలాగే, ప్రస్తుత సమాజంలో తీవ్ర సమస్యగా మారిన బాల్య వివాహాల గురించి గ్రామస్థులకు, పిల్లలకు ప్రత్యేకంగా వివరించారు. బాల్య వివాహాలు చట్టరీత్యా నేరమని, దీనివల్ల చిన్నారుల బాల్యం నాశనం కావడంతో పాటు వారి ఆరోగ్యం తీవ్రంగా దెబ్బతింటుందని హెచ్చరించారు. ప్రతి ఒక్కరూ చదువుపై దృష్టి పెట్టాలని సూచించారు.
జీవితంలో విజయం సాధించాలంటే ప్రతి విద్యార్థికి క్రమశిక్షణ అత్యంత ప్రాధాన్యమని, క్రమశిక్షణతో కూడిన చదువే ఉజ్వల భవిష్యత్తుకు పునాది అని పిల్లలకు హితవు పలికారు.
బాలల దినోత్సవ వేడుకల జోష్ను పెంచుతూ పిల్లలందరికీ ఎంతో ఆప్యాయంగా స్వీట్లు పంపిణీ చేశారు. ఈ కార్యక్రమంలో గ్రామ పెద్దలు, పాఠశాల ఉపాధ్యాయులు, గ్రామస్థులు మరియు పిల్లలు పెద్ద సంఖ్యలో ఉత్సాహంగా పాల్గొన్నారు.