సిద్దిపేట, నవంబర్ 10(ప్రజా ముద్ర న్యూస్) : ఈ నెల 19న ముఖ్యమంత్రి రేవంత్ రెడ్డి సిద్దిపేట జిల్లాలో పర్యటించనున్నారు. ఈ నేపథ్యంలో నిర్వహించనున్న భారీ బహిరంగ సభ ఏర్పాట్లను మంత్రులు గడ్డం వివేక్, పొన్నం ప్రభాకర్, ప్రభుత్వ విప్ ఆది శ్రీనివాస్, పలువురు కాంగ్రెస్ పార్టీ ముఖ్య ప్రజాప్రతినిధులు క్షేత్రస్థాయిలో పరిశీలించారు.
సభా ప్రాంగణం, వేదిక నిర్మాణం, ప్రజల రాకపోకలకు సంబంధించిన మార్గాలు, ఇతర మౌలిక సదుపాయాల ఏర్పాట్లను వారు సమీక్షించారు. ఈ సందర్భంగా అధికారులకు, పార్టీ నాయకులకు పలు కీలక సూచనలు చేశారు. ముఖ్యమంత్రి పర్యటనను అత్యంత విజయవంతం చేసేలా అన్ని విభాగాలు సమన్వయంతో పనిచేయాలని, ఏర్పాట్లలో ఎక్కడా ఎలాంటి లోటుపాట్లు తలెత్తకుండా చూడాలని ఆదేశించారు.
ఈ పరిశీలన కార్యక్రమంలో నియోజకవర్గ ఇన్‌చార్జులు ప్రతాప్ రెడ్డి, పూజల హరికృష్ణ, శ్రీనివాస్ రెడ్డి, మార్కెట్ కమిటీ చైర్మన్లు, మాజీ సర్పంచులు, కార్పొరేటర్లు, కాంగ్రెస్ పార్టీ సీనియర్ నాయకులు తదితరులు పాల్గొన్నారు.